Sul tetto del mondo

S' ciòp e Picòun

Messaggio inserito da luigi il 24/02/2012 alle ore 14.43.04

La nèbia cme 'na quêrta la quacia sò la basa
'Na schina d'apenein e i spali mòj ed guasa
Golena! Trincea! Fiòm, giaròun e acqua
A Rez la nôt la canta e i sò muntagni san ed grapa!

Partiven da l'Italia dôp du ân ed Resistèinsa
Scapeven la miseria, la guèra l'eva magnè sò tòtt
Minera, carbòun, guèra, tèra ed fama
Du arzân e un mudnes rivè in Belgio da 'na stmana

La lûs ed la candela, la fa da ôc al me picòun
Supli mateina e sira seinsa mai veder al sol
La luna, la stèsa cumpagna a còla dl'apenein
Ma chi sa se l'as capis s'as dà al curâg per n' êtra lôta

Luna 'scolta, luna bàla
L'è la solita banda cl'intona la to fôla
Luna canta, luna 'scolta
I solit delinqueint ch'in scampè alla Resistèinsa

Fra 'na scrana e 'na tomana sdù cme sac ed pòm da tèra
Ciacareven intant che biven e s'ricordeven 'dal so tèra
A Modna! A Rez! Slonga al bràz e su al bicer
Canta, bou e sbraia luna l'è pèina pasè 'na stmana

Da quand la nèbia cme 'na quêrta la quacieva sò la basa
'Na schina d'apenein e i spali mòj ed guasa
Golena! Trincea! Fiòm, giaròun e acqua
A Rez la nôt la canta e i sò muntagni san ed grapa!

Luna 'scolta, luna bàla
L'è la solita banda cl'intona la to fôla
Luna canta, luna 'scolta
I solit delinqueint ch'in scampè alla Resistèinsa
Trincea, calanc, muntagna e minera
Du ôc, la luna, s'ciòp e picòun
Adèsa som vècc che nostalgia 'dla gioventò
Adèsa som a cà, trop stòff, per 'na rivolusiòun!